Колбай Морасада берьюлы ике мөфти булды

Морасага килүне алар Колбай Морасада туган танылган дин әһеле Әхмәтзәки Сафиуллин эзләре буенча кече сәфәр буларак бәяләделәр. Инде мәгълүм булганча, ноябрьдә Нурлатта республика дин әһелләре өчен Әхмәтзәки Сафиуллин укулары үткәрелергә тора, аның турында саллы гына китап та нәшер ителгән. Кунаклар яңа чыккан китаплар белән бергә мәчеткә палас та бүләк итеп калдырдылар. Өйлә намазы укып, мәчет картлары белән аралашканнан соң кунаклар Габдулла Кариев музеенда озаклап булдылар, якташыбыз хөрмәтенә ясалган күргәзмә белән таныштылар. Әхмәтзәки хәзрәтнең беренче шәкертләреннән булган Тәлгат хәзрәт Таҗетдин үзе дә байтак истәлекләре белән уртаклашты, мәртәбәле кунак буларак музейда култамгасын да калдырды.