Район башлыгы ветераннарны Яңа ел табынына җыйды

Равил Әфраимович иң элек аларның барысы белән дә күрешеп-танышып чыкты.

- Мин бүген бик шат, чөнки сезнең кулларыгызда, карашларыгызда яшәү көчен тойдым, - диде ул бәйрәм табынын ачып. - Биредә төрле тармакларда көч түккән ветераннарыбыз җыелган, димәк, состав бик куәтле дигән сүз. Нурлат районының көчле потенциаллы булуы, районның үсүе - сезнең хезмәтегез. Алга таба тагы да югарырак үрләргә ирешербез дип ышанам, һәм монда сезнең төпле киңәшләрегезгә дә өмет итәм, - дип төгәлләде ул сүзен һәм ветераннарны Яңа ел белән котлап, иң изге теләкләрен юллады. . Аннан бәйрәм иң күркәм мизгел белән дәвам итте: Равил Кузюров Бөек Ватан сугышы ветераны Николай Коноваловны 90 яшьлек юбилее белән котлады - Россия Президенты Владимир Путинның рәсми котлау открыткасын һәм район җитәкчелеге исеменнән бүләк тапшырды.