Баш бухгалтерыбызны юбилее белән котлыйбыз!

“Нурлат-информ”ның икенче каттагы кабинетында ут соңга кадәр сүнми. Шәһәр кичке тынлыкка чума барганда, биредә, монитор артында эш кайный – безнең баш бухгалтер Роза Һадиева саннарга күмелеп утыра: салымнар, финанс түләүләре, грантлар буенча хисап, хезмәт хаклары... Кыскасы, баш бухгалтер – вазыйфа гына түгел, ә тәртип сакчысы, аның өчен саннар ял итә белми. 

Район массакүләм мәгълүмат чараларының иҗади коллективына Роза Һадиева өч еллап элек кушылды. Бер карасаң, гомере буе безнең белән булган диярсең: ул үзенә кадәр эшләгән баш бухгалтерның лаеклы дәвамчысы булып кына калмыйча, әлеге нигезне тагын да ныгытты. Чөнки медиаөлкә, журналистларның тормыш ритмын үзгәртеп, зур тизлек белән алга омтыла. Иҗади коллектив нейрочелтәрләрне, яңалыкларны тәкъдим итүнең яңа ысулларын үзләштергән арада, Роза Фәритовна әлеге инновацияләрне зур осталык белән финанс хисабына кертә. 

Ә әлеге ныклы һөнәри сабырлык артында зур һәм тату гаиләсен җылыта торган йөрәк яшеренгән. Өйдә аны тормышының мәгънәсе булган якыннары көтә. Ныклы терәге булган тормыш иптәше, Казан инновация университетында белем алучы ике сөйкемле кызы – аның горурлыгы һәм дәвамчылары. Гаилә учагында ул яраткан тормыш иптәше, әни, шул ук вакытта каенанасы өчен сөекле килен дә. Һәм әлеге мәхәббәт аңа бар яктан да килгән өлгер хатын-кыз булырга көч бирә. 

Бу шимбәдә хөрмәтле Роза Фәритовна матур юбилеен билгеләп үтәчәк: шәхси календарендагы ике “5”ле аның үткән тормышына бәя дә әле. 55 яшь – алтын урталык ул, бу чорда зирәклек инде җыелган була, ә энергия ташып тора. Роза Фәритовна, Сезгә чиксез сәламәтлек һәм бәхетләр телибез, “Нурлатинформ”дагы хезмәтегез шатлык һәм канәгатьлек хисләре генә бүләк итсен. Юбилеегыз белән! 

“ТАТМЕДИА” АҖнең “Нурлат-информ” филиалы коллективы.