Бикүле авылында чираттагы күмәк ифтар узды

Мөбарәк Рамазан аенда Нурлат районының Бикүле авылында зур ифтар мәҗелесе үтте. Бу юлы авылдашлары өчен юмарт сый-хөрмәтне Гатиннар гаиләсе әзерләгән иде. Ринат белән Рахилә хәзерге вакытта Самарада яшәсәләр дә, традицияләрне онытмыйлар һәм туган җирләре белән тыгыз элемтәдә торалар.

Бәйрәм кичәсе җирле мәктәптә узды. Мул табыннар артына авылның 150лщп төрле яшьтәге кешесе – балалардан алып өлкәннәргә кадәр җыелды. Чара  Коръән сүрәләрен уку һәм вәгазьләр белән башланып китте, бу очрашуга нур һәм бердәмлек рухы өстәде.

Ифтар югары дәрәҗәдә оештырылган иде. Кичә ахырында авылдашлары Гатиннар гаиләсенә күрсәткән игътибарлары һәм кайгыртучанлыклары өчен чын күңелдән рәхмәт белдерделәр. Шулай ук бу мөһим чараны әзерләүдә һәм үткәрүдә ярдәм иткән барлык кешеләргә рәхмәт сүзләре ирештерелде.