Нурлатның табиб-хирургы суыклардан саклану буенча киңәшләрен бирде

“Еш кына суыктан битнең ачык участоклары – борын, ияк, бит алмалары, колаклар, шулай ук аяк һәм кул бармаклары зыян күрә, – ди Нурлат районы үзәк хастаханәсе табиб-хирургы Иршат Хөснетдинов. – Җылылык әйләнеше системасы әле ныгырга өлгермәгән балаларга һәм өлкәннәргә аерым игътибар бирергә кирәк. Кысан һәм дымлы кием киеп йөрүчеләр, кан тамырлары авыруларыннан интегүче яки тәмәке тартучы кешеләр дә куркыныч төркемендә – никотин тукымаларны җылылыктан мәхрүм итеп, капиллярларны кысачак”.

Өшүнең беренче билгеләрен сизгәннән соң нишләргә?

“Әгәр сез урамда йөргәндә тәнегез оюын сизәсез, битләрегез кызарган икән – бу беренче сигнал. Күпчелек очракта җылыга 20-30 минутка булса да кереп тору җитә, – ди Иршат Маратович. – Җылынуның иң яхшы ысулы – җылы су яки үз тәнегез җылысын куллану, мәсәлән, туңган кулларны култык астына тыгып тору. Әмма һич кенә дә кайнар су кулланырга ярамый. Күпләр тәннәрен кар белән ышкып хаталаналар, болай эшләү микрояралар барлыкка китерә һәм зарарланган тукымаларны тагы да көчлерәк җәрәхәтли. Шулай ук алкоголь кулланырга да ярамый: спиртлы эчемлекләр җылылык иллюзиясе генә тудыра, асылда организм аны тагы да тизрәк югалта гына”.