Нурлатта мәдәният хезмәткәрләрен хөрмәтләделәр

Бәйрәм рухы бусагадан ук сизелде: чара кунакларын матур фотозона каршы алды, анда нурлатлылар һөнәри бәйрәмнәре истәлеге итеп фотога төштеләр. Фойеда чәй эчү оештырылган иде – кичәдә катнашучылар рәсми өлеш башланганчы җылы, дустанә мохиттә аралаша алдылар. Соңыннан тантана тамаша залында дәвам итте.

Сәхнәдән тармак вәкилләренә котлау сүзләре белән район башлыгы вазыйфаларын башкаручы Иван Захаров мөрәҗәгать итте. Үзенең чыгышында ул мәдәният хезмәткәрләре хезмәтенең мөһимлеген ассызыклады һәм район үсешенә кертә торган өлешләре өчен рәхмәт белдерде.

Котлауларга район башкарма комитеты җитәкчесе вазыйфаларын башкаручы Айрат Морзаханов, батальон командиры, кече лейтенант Альберт Мөхәммәтов, “Хәрби туганлык” җитәкчесе Зиннур Мотаһиров һәм район башкарма комитетының мәдәният бүлеге җитәкчесе Рәзилә Әхмәдиева кушылдылар.

“Үткән чорда мәдәният бүлегебез яхшы нәтиҗәләргә иреште. 16 меңнән артык мәдәни-массакүләм чара үткәрелде. Зур грант проектлары уңышлы тормышка ашырылды, мәдәният учреждениеләренең матди-техник базасы ныгытылды, “Пушкин картасы” актив кулланылды”, – дип үз чыгышында эш нәтиҗәләренә тукталды Рәзилә Илгизәровна һәм тармак ветераннарына рәхмәт белдерде.

Кичәнең төп мизгелләренең берсе – бүләкләү тантанасы булды. Татарстан Республикасы Мәдәният министрлыгыннан, ТР Мәдәният өлкәсендә инновацияләр кертү һәм традицияләрне саклау ресурс үзәгеннән, район җитәкчелегеннән һәм мәдәният бүлегеннән мактау грамоталары һәм рәхмәт хатларын дистәләгән белгеч – үзешчән артистлар, хореографлар, музыкантлар, китапханәчеләр, мәдәният йортлары хезмәткәрләре һәм башкалар алды.

Мәдәният хезмәткәрләре профсоюзының Нурлат район оешмасы рәисе Таңсылу Габдрахманова актив хезмәткәрләргә Татарстан Республикасы Профсоюзлар федерациясенең мактау грамоталарын тапшырды. Альберт Мөхәммәтов махсус хәрби операциядә катнашучыларга ярдәм итүгә зур өлеш керткән хезмәткәрләрне 29657нче хәрби частьның “Махсус хәрби операциягә ярдәм иткән өчен” медальләре белән билгеләп үтте. Зиннур Мотаһиров “Хәрби туганлык” оешмасыннан рәхмәт хатлары тапшырды.

Тантаналы чараны музыкаль чыгышлар дәвам итте. Концерт программасында лирик һәм патриотик җырлар яңгырады, ә яшь биючеләр залны халык һәм заманча биюләр энергиясе белән җанландырдылар.

Кичә җылы рәхмәт сүзләре һәм бергәләп фотога төшү белән тәмамланды – бу Нурлат районының мәдәни тормышында буыннар бердәмлеге һәм дәвамчанлыгы символына әверелде.