Татарстанда диспансерлаштыру программасына яңа тикшеренүләр өстәлде

Төп яңалыклар: 

· 40 яшькә кадәрге гражданнар өчен атеросклерозны иртә профилактикалау өчен липопротеин күләме һәм липид профиленә анализ кертелгән. 
· 21 яшьтән алып 49 яшькә кадәрге хатын-кызлар биш елга бер тапкыр аналык муентыгында яман шеш барлыкка килү куркынычының төп факторы булган кеше папилломасы вирусына (ВПЧ) тест уза алачак. 
· Гипертония һәм диабет белән авыручыларга аерым очракларда телемедицина технологияләре ярдәмендә тикшеренүләр узарга рөхсәт ителә.

Ведомство мәгълүматлары буенча, 2025 елда диспансерлаштыру барышында республика халкында 100 меңнән артык төрле авыру ачыкланган. Тикшерелгәннәрнең якынча 10 процентында теге яисә бу авыру үсешенең куркынычы югары булуы ачыкланган. 
18 яшьтән 39 яшькә кадәрге гражданнар диспансерлаштыруны – өч елга бер тапкыр, ә 40 яшьтән өлкәнрәкләр ел саен уза. 2026 елда тикшеренүгә 1987, 1990, 1993, 1996, 1999, 2002, 2005, 2008 елларда туган кешеләр чакырыла.

Стандарт программага төп күрсәткечләрне үлчәү (буй озынлыгы, авырлык, кан басымы), кан анализлары, флюорография һәм ЭКГ керә. Кешенең җенесенә, яшенә һәм авырулар анамнезына карап, өстәмә процедуралар билгеләнергә мөмкин, мәсәлән, хатын-кызлар өчен маммография яки яман шешкә тест үткәрелә.

Диспансерлаштыру “Дәвамлы һәм актив тормыш” һәм “Гаилә” илкүләм проектлары кысаларында бушлай үткәрелә.

“Татар-информ” материалы нигезендә