Татарстанда янгын сүндерүчеләр һәм коткаручыларга яңа техника тапшырдылар

Бүген Казанда Россия МЧСның Татарстан буенча Баш идарәсе һәм республиканың Гражданнар обронасы һәм Гадәттән тыш хәлләр министрлыгы бүлекчәләренә 24 берәмлек яңа техника тапшырылды. Яңа автомобиль ачкычларын Татарстан Премьер-министры Алексей Песошин һәм төбәк МЧСы идарәсе башлыгы Ирек Кадамов тапшырдылар. Бу хакта Татарстан Рәисенең матбугат хезмәте хәбәр итә.

Техниканың бер өлеше республика бюджеты исәбенә сатып алынган — алар арасында дүрт Haval җиңел автомобиле һәм дүрт “Лада Нива Легенд”, “Садко” йөк машинасы, йөк һәм пассажирлар ташучы “ГАЗель” һәм “Лада Веста” бар. Калган машиналар һәм җиһазлар федераль бюджет акчаларына алынган, бу – янгын автоцистерналары, штаб автомобиле, катерлар һәм пилотсыз системалар.

Техниканы тапшыру Татарстан Республикасы гадәттән тыш хәлләрне кисәтү һәм аларның нәтиҗәләрен бетерү буенча бердәм дәүләт системасының территориаль системасының 2025 елгы эш нәтиҗәләрен йомгаклау һәм киләсе елга бурычларны билгеләүгә багышланган киңәшмәсе кысаларында узды. 

Тантанадан соң кунаклар Татарстан янгын сагының 200 еллыгына багышланган күргәзмәне карадылар. Архив документлары буенча, Казан губернасында беренче янгын часте 1825 елда ук барлыкка килгән. Система үсеше тарихы турында республиканың Гражданнар обронасы һәм Гадәттән тыш хәлләр министры урынбасары Николай Суржко сөйләде.