Татарстанда социаль стипендиягә кемнәр хокуклы

Аңа түбәндәге категорияле кешеләр хокуклы:

- ятимнәр һәм ата-ана тәрбиясеннән мәхрүм калган студентлар;
- уку дәверендә әтисе белән әнисенең икесен дә яки бердәнбер әтисен яисә әнисен югалткан укучылар;
- балачактан сәламәтлек мөмкинлекләре чикләнгән кешеләр, шулай ук инвалид балалар һәм I, II төркем инвалидлар;
- хәрби хезмәт вакытында алган имгәнүләр яки авырулар нәтиҗәсендә инвалид калган студентлар;
- хәрби хәрәкәтләр ветераннары;
- контракт буенча ким дигәндә өч ел хезмәт иткән һәм түбәндәге сәбәпләр аркасында эштән азат ителгән гражданнар, бу сәбәпләргә контракт срогы чыгу, сәламәтлекләре начараю һәм башкалар керә;
- радиация аварияләреннән зыян күрүчеләр, шул исәптән Чернобыль һәлакәте һәм башка аңа охшаш вакыйгалар;
- дәүләт социаль ярдәмен алучы укучылар.

Льготалы категорияләргә керүче, “яхшы” һәм “бик яхшы” билгеләренә укучы беренче һәм икенче курс студентларына, бердәнбер ата-анасы I төркем инвалид булган 20 яшькә кадәрге студентларга югары социаль стипендия
бирелә.

Стипендияне рәсмиләштерү өчен университетның тиешле бүлегенә (деканат, профком яки социаль эшләр бүлеге) мөрәҗәгать итәргә кирәк. Льготага хокукны раслаучы документлар тапшыру зарур, болар – белешмәләр, таныклыклар, хәрби билет һәм башка кирәкле кәгазьләр.

Чыганак һәм фото: “Татар-информ” мәгълүмат агентлыгы