Үзизоляциядәге нурлатлыларга кайгырту күрсәтелә Районның 40 гаиләсе исемен белдерергә теләмәгән иганәчедән ярдәм алды

– Дин кануннарын үтәп яшәүче бер эшмәкәр якташыбыз иганәчелек ярдәме күрсәтте – ашамлыклар, үзизоляция чорында кирәкле көнкүреш товарлары бүлеп бирде, – диде Габдулла хәзрәт Мортазин. – Аларны без пакетларга җыеп, шәһәрнең Түбән Нурлат һәм шикәрчеләр микрорайоннарында, Якты Күл, Биккол, Иглай авылларында  ялгыз яшәүче өлкәннәргә, күпбалалы һәм ятим балалар тәрбияләнүче гаиләләргә өләштек.

Җыелмаларда иң кирәкле товарлар – икешәр килограмм карабодай, дөге ярмалары, макарон эшләнмәләре, шикәр комы, чәй, май, печенье, бәдрәф кәгазе, сабын, савыт-саба юу чаралары, гомумән, беренчел кирәк-яраклар тупланган. Исемен киң җәмәгатьчелеккә белдерергә теләмәгән игелекле нурлатлы шул көннәрдә тагын шулкадәр азык-төлек җыелмалары әзерләп куйган, алар мөхтәсибәт аша районның башка авылларында яшәүче мохтаҗларга һәм өлкәннәргә таратылачак.