Нурлат районының Биккол авылында Ирек Диндаровны искә алдылар

Кичәдә язучының каләмдәшләре - Яр Чаллыдан филология фәннәре кандидаты, язучыларның Г.Исхакый исемендәге премиясе лауреаты Факил Сафин, шагыйрә Әлфия Ситдыйкова, журналист Рәис Зарипов, районның татар теле һәм әдәбияты укытучылары, мәдәният бүлеге белгечләре һәм язучының туганнары, авылдашлары катнашты. Кунаклар иң элек авылда язучының истәлегенә багышлап ачылган музей почмагын карадылар, ә аннан хәтер-хатирәләр белән үрелеп барган кичәдә Ирек Диндаровның кыска, әмма туган халкы өчен янып-көеп узган гомер юлы сүтелде, аның иҗат юлы яктыртылды.
Кызганычка каршы, якташыбыз якты дөньядан бик яшьли, 46 яшендә үк китеп бара. Ирек Диндаровның үзе исән вакытта ике - "Төркиягә сәяхәт" һәм "Әбләев хикмәтләре" китаплары дөнья күрә, вафатыннан соң туганнары ярдәме белән "Соңгы мөнәҗәт" һәм "Йолдыз җиле" проза җыентыклары бастырыла.