Балалар да белеп торсын

Семинарны кайсы да булса хуҗалык яисә авыл җирлеге базасында түгел, ә шәһәр гимназиясендә үткәрүләре юкка түгел. Чөнки бүгенге көндә амброзия район һәм шәһәрнең 3 балалар бакчасы һәм 3 мәктәбе территориясенә дә үтеп кергән. Шәһәр гимназиясе территориясендә дә бар ул. Һәм семинарның гамәли өлешендә балалар аны үз күзләре белән күреп, аларга каршы көрәшү чаралары белән таныша алдылар. Гомумән, семинар барышында карантин үсемлекләргә каршы көрәшү чараларын чагылдырган видеоматериал да, төрле чыгышлар да балаларда һәм семинарда катнашучыларда бу хакта тулы күзаллау тудырырга ярдәм итте.

Кызганычка каршы, Нурлат районы республикада амброзия иң киң таралган районнардан исәпләнә. "Бүгенге көндә аның таралу мәйданы 581, 25 гектар тәшкил итә. Амброзия үтеп кергән авыл җирлекләре саны да арта тора, Яңа Иглай, Киекле, Төрнәс, Биккол авыл җирлекләре территорияләрендә аеруча күп ул. "Нурлат сөте" ОООсының Мамык, Түбән Нурлат бүлекчәләре, "Южная", "АгроРазвитие" һ.б. хуҗалыклары кырларында да әлеге зарарлы үсемлекләр очраштыргалый. Бусы исә аеруча куркыныч санала, чөнки бу бөтен иген уңышына зыян китерергә мөмкин бит. Шуңа да семинарда амброзиягә каршы көрәшкә бергәләп алынырга, бар көчне аларны юк итүгә куярга кирәклеге җентекләп әйтелде ", - ди Нурлат бүлеге дәүләт инспекторы Николай Ларионов.