Исерек машина йөртүчеләргә көн бетә

Бу атна башыннан районның ЮХИДИ бүлеге хезмәткәрләре дә машина йөртүчеләрне "тоталь" тикшерә башлады. Мондый тикшерүләргә башка службаларны да тартырга җыеналар. "Акция Дәүләт Думасында руль артында алкоголь кулланучыларга каршы закон беренче укылышта кабул ителгәннән соң игълан ителде. Исерекләргә карата закон бик кырыс булырга охшаган. Шуңа да машина йөртүчеләрне алдан ук кисәтергә җыенабыз. 31 мартка кадәр узачак акция барышында тестлаштыру буенча рейдлар үткәрергә планлаштырабыз", - ди ЮХИДИнең пропаганда инспекторы Ринат Мөгайнетдинов. Статистикадан күренгәнчә, быел исерек көе руль артына утырган 43 кеше тоткарланган инде.