Нурлат бердәмросслары сайлау кампаниясенә йомгак ясадылар

Нурлат җирле бүлекчәсе сәяси Советы әгъзасы Флюра Ногманова бердәмроссларның сайлауларда активлык күрсәтүләрен аерым билгеләп үтте.

- Сайлауларга әзерлек чорында бердәмросслар халык арасында зур эш алып бардылар. 27 мәйданчыкта праймеризлар узды, авылларда халык җыеннары һәм шәһәрдә гражданнар белән очрашулар зур активлык белән үтте. Сайлауларда халык күпчелек тавышны "Бердәм Россия"гә биреп, үз ышанычын белдерде. Партиянең бәхәссез җиңү яулавы алга таба да сайлаучыларның ышанычын аклап эшләүне бурыч итеп куя, - диде ул.

Конференция делегатлары бүлекчәнең сайлауларга әзерлек буенча эшен канәгатьләнерлек дип тапты. Шунда ук делегатлар җирле сәяси Совет составына үзгәрешләр дә керттеләр. Сәяси совет әгъзалары Рәмзия Сингатуллина белән Аркадий Клементьев урынына Сергей Белов белән Әлфия Галәветдинова сайланды. Соңрак яшерен тавыш бирү юлы белән альтернатив нигездә муниципаль берәмлек башлыгы - "Нурлат муниципаль районы" муниципаль берәмлеге Советы рәисе вазифасына кандидат итеп Равил Кузюровны сайладылар.

Конференцияне бүлекчә секретаре Равил Кузюров алып барды, аның эшендә ТР Дәүләт Советы депутаты Марат Шаһитов катнашты.