Нурлат мәктәпләрендә үткән имтиханнар нәтиҗәләре зур сөйләшү тудырды

Сәбәп җитди иде: район мәктәпләрендә БДИ нәтиҗәләре куанырлык түгел: 9 фәннән күрсәткечләр республика саннарыннан түбән. Район мәгариф идарәсе начальнигы Линар Манәпов чыгышында китерелгән чагыштырмача саннардан күренгәнчә, узган елгы күрсәткечләрдән дә шактый кайтыш. Утырышка рәислек итүче Дамир Ишкинеев фикер алышуга мәктәп директорларын да, ата-аналар комитеты рәсиләрен дә, психологларны һәм хәтта репетиторларны да тарта алды һәм шул рәвешле сәбәпләрнең гомуми картинасы тудырылды. Утырышта катнашкан район башлыгы урынбасары Флюра Ногманованың БДИга әзерлек темасына ата-аналар конференциясе үткәрергә дигән тәкъдиме хуплау тапты.