Пививканы бушлай ясатып була

Икеайлыкны үткәрү республикада котыру чире йоктырган хайваннарның кискен артып китүе белән бәйле. Мәсәлән, агымдагы елда республикада котыру чиренең 240 очрагы теркәлгән. Бу - узган елның шул чоры белән чагыштырганда 6,3 тапкырга артыграк.

- Нурлатта быел котыру чиренең ике очрагы ачыкланды. Аның берсе шәһәрдә төлкедә, икенчесе Яңа Иглайда йорт мәчесендә иде, - ди дәүләт ветеринария берләшмәсенең Нурлат бүлеге ветеринария инспекторы Ләйсән Ишкнеева. - Котыру чире йорт хайваннарына нигездә төлкеләр аша күчә. Ә аларның саны быел күпкә артуы билгеле. Кешеләргә исә авыру котыру чирле төлкеләр яки йорт хайваннары тешләгәндә күчәргә мөмкин.

Котыру - үлемгә китерә торган авыру, әмма аны иммунлаштыру ярдәмендә булдырмый калу да мөмкин. Яраны шунда ук сабын белән юу, һәм берничә сәгать эчендә прививка ясату авыруның таралуына юл куймый.

Әлбәттә инде, котыру чиренә каршы чаралар арасында йорт хайваннарына прививкалар ясату да нәтиҗә бирә. Шуңа да икеайлык барышында республикада, шул исәптән Нурлатта да вакцинация чаралары бушлай үткәреләчәк.

- Бу чорда барлык нурлатлылар да йорт хайваннарын безнең Линейная урамында урнашкан ветеринария берләшмәсенә алып килеп, котыру чиренә каршы бушлай прививка ясата ала, - ди ветеринария инспекторы.

Бу чорда шулай ук йорт хайваннарының исәбен алу планлаштырыла, шулай ук авыл хуҗалыгы предприятиеләре, шәхси ярдәмче һәм фермер хуҗалыкларындагы терлекләрне прививкалауны да җитди контрольгә алмакчылар.