Югары Нурлат микрорайонында 6 учреждение бер түбә астына җыелачак

Бүген, 28 апрельдә, район башлыгы Равил Кузюров әлеге объектта булып ремонт эшләре белән танышты.
1985 елда типовой проект буенча 320 балага исәпләнеп төзелгән мәктәп бинасында узган елның октябрь аеннан бирле "Престиж-строй" җәмгыяте хезмәткәрләре капиталь ремонт эшләре алып баралар. Бүген биредә тәрәзәләр, идәннәр алмаштырылган, отмосткалар, җылылык, канализация, электр системалары яңартылган. Хәзер ишекләр кую һәм отделка эшләре калып бара.
Равил Әфраимович капиталь ремонт эшләреннән канәгать булуын әйтеп әлеге объектны ачуны авыл бәйрәме итеп үткәрергә тәкъдим итте. 4 ел дәвамында мәктәпсез яшәгән микрорайонда киләсе уку елында башлангыч мәктәптә 7 бала укырга теләк белдергән. Моннан тыш, балалар бакчасына йөрүче 29 балага барлык таләпләргә туры килгән яңа балалар бакчасы да үз ишеген ачачак.