Ханты-Мансийскига Нурлат бозы кирәк

Югралыларның безнең шәһәргә беренче килүләре генә әле. Кунакларның тренерлары Сергей Полуэктов әйтүенчә, алар "Ледок"ка Интернет аша юлыкканнар икән һәм биредәге барлык шартларны да өйрәнгәч, 1997 елгы үсмерләр командасы белән яңа сезонга әзерлекне нәкъ менә Нурлатта үткәрергә булганнар. Ханты-Мансийскиның яшь хоккейчыларына исә "Ледок" җитәкчелеге барлык шартларны да тудырган. "Хоккейчылар чирәмдә, аннан бозда шөгыльләнәләр, тренажер залы да эшли, һәр көнне ДЮСШ бассейнына да йөриләр, кыскасы, кунакларыбыз барысыннан да канәгать", - ди "Ледок" боз сарае методисты Галина Еремеева. Ә киләсе атнада "Югра" хоккейчылары Әлмәтнең "Нефтяник" командасы белән спарринг-матч уздырырга планлаштыра.