Нурлатта Бөек Ватан сугышында катнашкан Антонина Андреевна Агапованы котладылар

Бу көннәрдә Антонина Андреевна Агапова да игътибар үзәгендә, аның тормыш юлы чын батырлык һәм тырышлык үрнәге булып тора.
Ветеранга рәхмәт сүзләрен беренче булып район башлыгы Дамир Ишкинеев җиткерде. 

«Сезне якынлашып килүче Җиңү көне белән котлыйм, – дип мөрәҗәгать итте Дамир Азатович Антонина Андреевнага. – Сезгә нык сәламәтлек, иминлек, озын гомер телим”, – диде ул.

Район башлыгы ветеранга чәчәкләр, Татарстан Республикасы Рәисе Рөстәм Миңнехановтан котлау открыткасы белән бүләк, район җитәкчелегеннән кер юу машинасы, шулай ук “Бердәм Россия” партиясеннән истәлекле бүләк тапшырды.

Котлауларга РФ Дәүләт Думасы депутаты Олег Морозовның җәмәгать ярдәмчесе һәм Халыклар дуслыгы йорты директоры Галина Терентьева да кушылды, ул депутат исеменнән бүләк тапшырды.

Антонина Андреевна, ә ул быел ул үзенең 99 яшьлеген билгеләп үтәргә әзерләнә, кунакларны җылылык һәм рәхмәт хисләре белән каршы алды. Күрсәтелгән игътибар аны тирән дулкынландырды. “Бөтенегезне дә якынлашып килүче Җиңү көне белән котлыйм! Барыгызга да сәламәтлек, тыныч һәм имин яшәүне телим”, – диде ул кунакларга үзенчәлекле нәсыйхәтен җиткереп.

Антонина Андреевна 1927 елда Куйбышев өлкәсе Кошки районы Кутузовка авылында туган. Күрше Андреевка авылында җидееллык мәктәпне тәмамлагач, ул шунда ук сугыш чоры авырлыклары белән очраша.

Аның хезмәт эшчәнлеге авыр 1943 елда башлана: япь-яшь кыз Нурлат тимер юл станциясендә үлчәүче (весовщица) булып эшкә урнаша. 1944 елда ук Антонина хәрби-эксплуатация бүлекчәсенә мобилизацияләнә. 1945 елның октябренә кадәр ул Германиядә фронт ихтыяҗларын тәэмин итү һәм илне торгызу өчен төяү эшләрендә катнаша.

1945 елның октябрендә демобилизацияләнгәннән соң, Антонина Андреевна Нурлатка тимер юлның Бөгелмә бүлеге карамагына кайта. Бу һөнәргә ул үзенең бөтен гомерен багышлый, Нурлат станциясендә 40 елдан артык товар кассиры булып эшли. Күпьеллык намуслы хезмәте өчен ул “Хезмәт ветераны” медале белән бүләкләнә.

Антонина Агапованың бөтен хезмәт биографиясе – сугыш елларында да, тыныч чорда да үз иленә фидакарь хезмәт итүнең ачык үрнәге. Ире Михаил Никифорович Агапов белән алар биш балага гомер бирәләр. Бүген ветеранның ике оныгы һәм ике оныкчыгы бар. Хәзерге вакытта Антонина Андреевна үзенең оныгы Наталья Ильичева тәрбиясендә яши.