Нурлатта Халыкара гаилә көне уңаеннан тантаналы чара узды

Аларны район башкарма комитеты җитәкчесенең беренче урынбасары Айрат Морзаханов тәбрикләде. 

“Гаилә – ышанычлы тыл, мәхәббәт һәм җаваплылык мәктәбе. Ярты гасыр кулга-кул тотынышып баручыларны, дүрт балага наз бүләк итүчеләрне һәм беренче сабыйлары дөньяга аваз салган нурлатлыларны бер сәхнәдә күрү сөенечле. Сез – районыбыз горурлыгы”, – дип ассызыклады ул, җыелучыларга мөрәҗәгать итеп. Ул аларның һәркайсына район җитәкчелегеннән истәлекле бүләкләр, рәхмәт хатлары һәм акчалата сертификатлар бүләк итте. 

Күпбалалы Хәйдәровлар бәйрәмгә тулы составта килгәннәр иде. Динар һәм Баярма гаиләсендә Камилә, Ләйсән, Мансур үсеп килә, күптән түгел уллары Роберт туган. Ә мәхәббәт тарихлары исә Нурлаттан меңәрләгән километр ераклыкта, Якутиядә башланып киткән – Баярма тумышы белән шуннан. 

“Динар ул вакытта командировкада иде, безнең якларда юллар төзеде. Сине күрдем дә шунда ук гашыйк булдым, ди. Башта мин бик озак ризалашмадым, бер дә белмәгән республикага ничек күченеп китим ди? Әмма йөрәгем сайлады һәм ялгышмады, хәзер Нурлат минем өчен туган шәһәремә әйләнде”, – дип уртаклашты Баярма Хәйдәрова. 

“Дөресен әйткәндә, аны күргәч үк, язмышым булуын аңладым. Күпмедер вакыттан соң әти-әнием белән таныштырырга үгетләдем, Нурлатка алып кайттым, аннан гаилә корып җибәрдек. Хәзер безнең зур йортыбыз һәм дүрт балабыз бар”, – дип елмая гаилә башлыгы. 
Ул төзелеш өлкәсендә хезмәт куя, ә Баярма якут һәм татар традицияләрен хөрмәт итүгә корылган гаилә учагын саклый. Район җитәкчелегеннән котлаулар һәм бүләкләр кабул итеп, алар балаларының күзләрендәге бәхет чаткыларының үзләре өчен иң зур бүләк булуын билгеләп үттеләр. 

Гаилә юбилейларын билгеләп үтүче парлар аерым соклану сүзләренә лаек булды. Алар арасында алтын туйларын бәйрәм итүче Камаевлар да бар иде. Идрис Габделәхәтович гомере буе эретеп ябыштыручы булып эшләгән. Тимер белән эшләү өчен таләп ителгән төгәллек, сабырлык һәм ихтыяр көчен ул, кече буыннарга үрнәк күрсәтеп, гаилә тормышында да үзенең яшәү кыйбласы иткән. Флюра Хисамовнаның күңел җылысы һәм кайгыртучанлыгы бөтен гаилә өчен терәк. Алар ике бала тәрбияләп үстергәннәр, бүген дүрт оныклары һәм шулкадәр үк оныкчыклары бар. 

“Төп сереме? Бер-береңне ишетә һәм гафу итә белүдер. Башта җиңел булмады, әмма бергә бернәрсәдән дә курыкмадык. Ә хәзер зур гаиләбезнең бер өстәл артына җыелуы иң зур шатлык. Балалар, оныклар, оныкчыклар янәшәбездә, бәхет шулдыр”, – дип уртаклаштылар юбилярлар. 

Бу көнне “Театр” скверы сәхнәсеннән җирле талантлар башкаруында иң матур җырлар яңгырады. Елмаюлар, балаларның шат авазлары, чәчәкләр һәм ихлас теләкләргә бай бәйрәм программасы аеруча дулкынландыргыч булып узды.