Биккол мәдәният йортында “Ел хатын-кызы” конкурсы җиңүчеләрен ачыкладылар

Алар арасында авылның иң хөрмәтле, иң зирәк хатын-кызлары. Мәсәлән, "Әбекәй-алтыным" номинациясендә хөрмәтләнгән Дания апа Баһманова - 6 бала анасы, 9 онык һәм 9 оныкчыгы бар бүгенге көндә, шул көннәрдә 80 яшьлеген дә билгеләп үткән икән әле. Ә менә "Өченче буын героинясы" номинациясе буенча сәхнәгә чыккан Гөлфия Сәйфуллина - өч бала анасы, шул авылда хезмәт куеп, лаеклы ялга чыккан кеше. Быел яңа булдырылган "Киленбикә" номинациясендә исә 27 ел буена каенатасы белән гомер кичергән Гөлҗиһан Әхмәтвәлиева бүләк алса, "Һөнәрем-минем язмышым"да Биккол авыл җирлеге башкарма комитеты секретаре Фаилә Закирова, "Хатын-кыз - ана" номинациясендә Илһамия Шәйхетдинова хөрмәтләнгән. "Ел ир-аты: хатын-кыз күзлегеннән" номинациясендә исә Рөстәм Баһманов җиңүче дип табылган. Биредә үк бу көнне юбилейларын билгеләп үтүчеләрне дә хөрмәтләргә өлгергәннәр, читтә яшәүче авылдашлары Разия Садретдинова белән Вәсилә Гәрәева сугыш чоры балалары өчен дә бүләкләр әзерләгән булган. Бәйрәм искиткеч җылы аралашу, хөрмәтләү чарасы булып бик матур узган.