Бәрәңгене башлыйлар

Ике ел рәттән сугарылып үстерелүче бәрәңгедән быел да мул уңыш көтәләр. Әле Чуваш Мәнҗесе ягындагы 201 гектарлы басуга да су сибү агретларын куйганнар бу сезонда. Шуңа да 332 гектардан барлыгы 11 мең тонналап икенче икмәк алырга планлаштыралар хуҗалыкта. Биредә бәрәңгенең 6 төрле сорты үстерелә. Сатып алучылар арасында иң популярлары Витессе, Удача, Розара сортлары икән. Җыеп алынган уңышны авыл хуҗалыгы ярминкәләренә кадәр яшелчә саклагычларга салмакчылар. Бу яктан хуҗалыкта проблема юк: 12 мең тонна яшелчә сыешлы саклагычлар яңа уңышны кабул итәргә әзер инде.