Җомга көнне Биектау районының "Элита" дәүләт нәсел предприятиесе ААҖ базасында үткән мөгезле эре терлек көтүен яңарту буенча технологларның 36нчы республика конкурсы үтте. Анда "Южная " хуҗалыгыннан Рушат Билданов өченче урынга лаек булды.
Рушат Европа технологиясе буенча конкурста катнашкан.
- Мондый технологиянең Харьков технологиясе буенча эшләүдән аермасы шунда - ул заманчарак һәм нәтиҗәлерәк санала, аның буенча эшләү 98% нәтиҗә бирә. Рушатның исә үз һөнәрендә тәҗрибәсе дә, белем дә җитәрлек. Узган ел аның күрсәткече 100 баш сыерга 100 бозау тәшкил итте бит, - ди Нурлат районының селекция-нәсел службасы начальнигы Тәлгать Мөхәммәтшин.
Дүрт этаптан торган конкурс исә технологларның эшләренә төрле яктан бәяләргә мөмкинлек биргән. Бу - теория һәм практика, учет һәм отчетлылык. Технологларның белемнәре исә 100 баллы система буенча бәяләнгән, Рушат 98 балл җыя алган. Уңышы өчен аңа ТР Авыл хуҗалыгы һәм азык-төлек министрыгы Дипломы һәм кыйммәтле бүләкләр тапшырганнар.
Нет комментариев