Нурлатта кызлар да, малайлар да сынатмый

Узган атнада Әлки районында “Кызыл Шәрыкъ-Агро” призларына үткән билбау көрәше буенча республика турнирында Нурлатның яшь көрәшчеләр командасы 3нче урынга лаек булды.

Әлеге турнир яшь көрәшчеләр арасында оештырыла. Быел ул республиканың 14 районыннан 2005-2007 елгы 170тән артыграк малай һәм кызны үзенә җыйды. Нурлат районын анда спорт мәктәбенең Расих Сәмигуллин һәм Илшат Әһлиуллин кул астында шөгыльләнүчеләрдән торган 10 кешелек команда тәкъдим итте. Анда Рамилә Гыймадиева (Чулпан), Илона Ерхова һәм Фәнил Төхвәтуллин (Нурлат) – 1нче, Риназ Хәкимов (Чулпан) – икенче, Булат Кыямов (Кәкре Атау) һәм Геннадий Насыйбуллин (Чулпан) өченче урыннарга лаек булдылар.