Нурлат аграрийлары җәйләү чорына конкрет бурычлар билгеләделәр

Районның авыл хуҗалыгы һәм азык-төлек идарәсе начальнигы Ислам Сафиуллин җитәкчелегендә җәйләүдә үткән гамәли семинарда районның барлык хуҗалыкларыннан зооветеринария белгечләре катнашты. Идарә белгечләре әйтүенчә, бүгенге көндә районда барлык терлекләр дә җәйләүләргә күченеп беткән, хәзер мул продукция алу өчен барлык таләпләрне дә истә тотып, тиешенчә эшләргә кирәк. Шунда ук дәүләт ветеринария берләшмәсенең Нурлат бүлеге җитәкчесе Василий Лысов җәйге чорда дару препаратлары һәм вакцинацияләүнең үзенчәлекләренә җентекләп тукталды. Семинарда шулай ук инде бүгеннән фермаларны, азык саклау урыннарын әзерли башлау, җәйге чорда азык әзерләүгә зур игътибар бирү турында да җитди сөйләшү булды һәм җәйләү чорына конкрет бурычлар билгеләнде.