Нурлатлылар Универсиаданы ябу тантанасында катнашып кайттылар

Әлеге бәйрәмгә баручылар арасында оешма-предприятие җитәкчеләре дә, төрле тармак хезмәткәрләре, спортчылар да, гаиләләре белән җыенеп чыгучылар бар иде. Мисал өчен, "Нурлатнефть" НГДУсы" үз хезмәткәрләренә 50 билет сатып алды һәм аларны автобус белән Казанга алып барып та кайтты. Ә менә Универсиада объектларын әзерләүдә үз өлешләрен керткән нурлатлыларны "Татнефть-Арена"да каршы алдылар, анда районнардан килгән кунакларга җиңелчә генә табын да корылган иде. "Безне оештыручылар бик зурлап каршы алды. Универсиадага әзерлек эшләрендә катнашучыларны барлык районнардан да җыйганнар иде. Бераз тамак ялгап алгач, автобусларга утыртып Универсиада ябылу тантанасына - "Казан-Арена"га алып киттеләр. Гомумән, барысы да искиткеч оешкан төстә үтте. Универсиада оештыручыларының үзләренә булышучыларга шул рәвешле хөрмәт күрсәтүләре һәммәбезнең күңеленә хуш килде", - дип тәэсирләрен уртаклашты райбашкарма комитетының яшьләр эшләре һәм спорт бүлеге җитәкчесе Әнәс Нәбиуллин.