Нурлатның Миндубай, Принц Бернес һәм Балетмейстер атлары Казан ипподромындагы чираттагы чабыш көннәрендә баш килделәр

Мисал өчен, 12нче чабыш көнендә "Нурлат" ат заводының мастер-жокей А.Каппушев иярләгән Миндубай җирән айгыры 3 яшькә кадәрге һәм аннан олырак чиста токымла атлар арасында уздырылган ТР атчылараы хөрмәтенә призы узышында баш килде. Шул ук көнне "ТНП-Зүзәйнефть" җәмгыятенең "Ягуар" спорт клубыннан Голден Каскад туры айгыры (жокее М.Маммуров) Универсиада-2013 хөрмәтенә уздырылган чабышта икенче урынны алды. 13нче чабыш көнендә "Ягуар" клубының Принц Бернес кара җирән айгыры (М.Маммуров) 2 яшьлек чиста токымлы гарәп аргамаклары арасында уйнатылган Maiden призын отты. Шул ук көнне "Нурлат" ат заводының Хариза җирән биясе Россиядә Пушкин көне хөрмәтенә уздырылган чабышта өченче булып килде. Әлегә соңгы - 14нче чабыш көне дә нурлатлылар өчен күңелле нәтиҗәләр белән башланды. "Ягуар" спорт клубының Балетмейстер җирән айгыры (мастер-жокей А.Иванской) Россия көне хөрмәтенә уйнатылган призны отуга иреште. Шул ук чабышта РФ Дәүләт Думасы депутаты Фатих Сибагатуллинның шәхси аты - Макс Отто туры айгыры (М.Маммуров) өченче урын алды. Ә "Нурлат" ат заводының Халисә туры биясе (А.Зәкиев) Россиядә туган атлар арасында үткәрелгән чабышта 1200 метрлы дистанцияне өченче булып узды.