Нурлат журналистлары Медиасабантуй үткәрде

Быел бу чара истәлекле дата – “Дуслык” (“Дружба”, “Туслах”) газетасының 95 еллык юбилеена багышланды. Бәйрәмгә редакциядә дистәләрчә еллар эшләгән матбугат ветераннары чакырылган иде. Олы яшьтәге хезмәткәрләр үткән юллары, газетаның еллар дәвамында ничек үзгәрүе һәм укучылар мәхәббәтенең һәрчак үзгәрешсез калуы хакында җылы истәлекләре белән бүлештеләр. 

Чөнки 95 – ул гади юбилей гына түгел, ул Нурлат районы тормышындагы тулы бер чор. Шул еллар эчендә район газетасы яңалыклар турында сөйләп кенә калмыйча, туган җиребезнең чын елъязмачысы, аның язмышы көзгесе һәм төрле буын вәкилләренең яшьтәше дә булды. Ветераннар белән хәзерге хезмәткәрләрнең очрашуы ике арадагы җепләрнең ныклыгын, өлкәннәрнең тәҗрибәсе яшь журналистларга кадерләп тапшырылуын һәм намуслылык, битараф калмау, кешеләргә хезмәт итү кебек иң яхшы традицияләрнең бүген дә яшәвен тагы бер раслады. 

Коллективны Нурлат районы башлыгы Дамир Ишкинеев исеменнән аның урынбасары Иван Захаров котлады. 

“Районыбыз газетасы – Нурлат районының чын елъязмачысы. 95 ел дәвамында ул район үсешенең төп сәхифәләрен чагылдыра, якташларыбызның язмышлары турында сөйли һәм тарихны киләчәк буыннарга тапшыра. Һөнәрегезгә тугрылыгыгыз, битараф булмавыгыз һәм көндәлек иҗади хезмәтегез өчен рәхмәт”, – дип теләкләрен җиткерде Иван Захаров. 

Ул корреспондент Ләйсән Галиева, баш бухгалтер Роза Һадиева, шоферлар Әнвәр Ногманов белән Газинур Гобәйдуллинга район башлыгы исеменнән намуслы хезмәтләре һәм җирле матбугатны үстерүгә керткән өлешләре өчен Рәхмәт хатлары тапшырды. 

Иганәчеләребез дә үз котлауларын җиткерде. Нурлат АТПсы генераль директоры Идрис Кәримов һәм “Татриэлтстрой” җәмгыяте җитәкчесе Илнур Сәлахов журналистларга яңа уңышлар һәм җиңүләр теләделәр. “Нурлат-информ”ның баш мөхәррир-җитәкчесе Сирень Сәмәрханова аларга “ТАТМЕДИА” АҖ генераль директоры Шамил Садыйковның Рәхмәт хатларын һәм истәлекле бүләкләр тапшырды. Ул ветераннарны да игътибарсыз калдырмады – аларның һәрберсенә бүләкләр бирде һәм тирән рәхмәт сүзләрен җиткерде. 

Ә медиасабантуй күңел ачулар белән дәвам итте. Журналистлар һәм ветераннар милли уеннар һәм ярышларда зур дәрт белән катнаштылар. Бәйрәм мул өстәлләр артында хуш исле пылау, шашлык һәм самавыр чәе белән сыйланып дәвам итте. Коллектив әгъзаларының үз куллары белән әзерләгән аш-су ризыклары бәйгесе бәйрәмгә аерым ямь өстәде – һәркем хезмәттәшләрен кулинария осталыгы белән гаҗәпләндерде.

Медиасабантуй традицияләрнең үткәндә калмавын, ә һәр санда, һәр репортажда һәм шундый җылы очрашуларда яшәвен тагын бер тапкыр исбатлады. Чорлар бәйләнеше нык, димәк, газетаның – киләчәге, ә укучыларыбызның – тугры һәм ышанычлы дусты бар.