Нурлатның төзелеш ветераннары хатирә яңартты

Нурлатта яшәүче Зөлфия Билданова төзелешкә очраклы рәвештә генә килгән дип әйтергә була. 

«Төзелеш оешмаларында эшләүчеләргә фатир бирәләр иде бит. Без – яшьләр, ә бу үз яшәү урыныбызны булдыру өчен шундый яхшы мөмкинлек булды. Төзелешкә шулай килеп эләктем дә, – ди Зөлфия Салиховна. 

Сылаучы-буяучы һөнәрендә ул 35 елдан артыграк. Инде 8 ел лаеклы ялда булса да, эшеннән китәргә җыенмый әле. Хезмәтенең нәтиҗәсе дә сөендерерлек бит: караңгы диварлар тигез, якты бүлмәләргә әйләнә һәм кешеләргә никадәр хезмәт итә. 

Нурлатта яшәүче Галина Шакирова да аның белән бергә озак еллар дәвамында участок начальнигы булып эшләгән. Алар районның дистәләгән торак пунктында клублар, фермалар, торак йортлар салганнар. Әмма Нурлат телевидениесе бинасын төзүләре иң истә калган объектларыннан берсе булган.

 “Бу үзенчәлекле заказ иде, – дип хәтер яңарта хатын-кызлар. – Биредә телевидение тапшырулары эшләнүен, монда бөтен район яңалыклары килеп торачагын аңлый идек. Эшнең һәр этабында җаваплылык тоеп хезмәт куйдык”. 

Элеккеге хезмәттәшләр хәзер дә аралашып торалар, ә Төзүчеләр көне алар өчен котлаулар кабул итү генә түгел, бик күп объектларда бергә хезмәт куйган дуслары белән очрашу мөмкинлеге дә. Быел бәйрәмнең тантаналы өлеше “Театр” скверында узды. 

Җыелучыларны район башлыгы Дамир Ишкинеев котлады. 

“Төзүче – гади һөнәр генә түгел, нәкъ менә бу һөнәр ияләре җирдә үз эзләрен калдыралар. Сез төзегән һәр йорт, мәктәп яки хастаханә кешеләргә дистәләрчә еллар буена хезмәт итә. Бу авыр, әмма игелекле хезмәтегез өчен сезгә рәхмәтемне белдерәм”, – диде Дамир Азатович. 

Бу көнне иң яхшы хезмәтчәннәргә төрле дәрәҗәдәге Рәхмәт хатлары һәм Мактау грамоталары тапшырылды. Бүләкләнүчеләр арасында район төзелеш оешмаларының берсендә участок начальнигы булып эшләүче Айдар Бәширов та бар иде. Аңа Татарстан Республикасы Төзелеш, архитектура һәм торак-коммуналь хуҗалыгы министрлыгының Мактау грамотасы тапшырылды. Айдар Рәшитович бу бүләкнең үзе өчен күңелле сюрприз булуын әйтте. 

“Әлбәттә, хезмәтемне республика дәрәҗәсендә билгеләп үтүләренә шатмын. Әмма бу туктап калу өчен сәбәп түгел. Районның иминлеге хакына алга таба да хезмәт итәчәкбез, яңа йортлар, юллар һәм объектлар кешеләргә яңа шатлыклар бүләк итсен”, – диде ул. 

Бәйрәм концерт белән тәмамланды: сәхнәдә җирле коллективлар һәм башкаручылар чыгыш ясады. Ә икенче көнне төзүчеләр кабат үз объектларына чыктылар. Аларның эшендә яллар булса да, планнарны һичшиксез үтәргә һәм срокларны истә тотып эшләргә кирәк бит.