Нурлатта гаилә юбилейларын билгеләп үтүче парларны хөрмәтләделәр

Бу бер-берләренә карата хөрмәт, тугрылык һәм җан җылысы белән тулган дистәләгән еллар бергә гомер итүче 25 гаилә пары өчен үзенчәлекле көн булды.

Шәһәрнең төп сәхнәсендә быел бриллиант, зөбәрҗәт, алтын, сапфир, якут һәм мәрҗән туйларын билгеләп үтүче, гаилә традицияләрен саклаучы парларны котладылар. Бәйрәмнең төп кульминациясе – “Мәхәббәт һәм тугрылык өчен” медален тапшыру булды. 2026 елда бу югары бүләккә 45 ел бергә гомер итүче Шәфигулла һәм Тәнзилә Фәйзуллиннар лаек булды.

Ирле-хатынлы Фәйзуллиннарның тормыш юлы – хезмәт сөючәнлек һәм тугрылык үрнәге. Шәфигулла Шәйхулла улы хезмәт биографиясен авыл хуҗалыгында яза башлый, “Игенче” колхозында зоотехник булып эшли. Соңрак аның оештыру таланты төзелеш өлкәсендә ачыла, анда ул гади белгечтән прорабка кадәр юл үтә, Нурлат районы инфраструктурасын үстерүгә зур өлеш кертә. Тәнзилә Һади кызы да хезмәт юлын аграр сектор белән бәйли, “Россия” колхозында бухгалтер булып эшли. Бүгенге көндә ул АПК хезмәткәрләренең район профсоюзын җитәкләп, Җәмәгать Советы составында тора. 

“Шундый бүләк алуыбызга бик шатбыз. Бу исемгә лаекбыз дип уйлыйбыз. Бер-беребезне аңлап, гаиләдә үзара хөрмәт һәм бердәмлек саклап яшибез. Гаилә кыйммәтләрен оныкларыбызга да сеңдерергә тырышабыз”, – дип уртаклаштылар ирле-хатынлы Фәйзуллиннар.
Бу көнне сәхнәгә күтәрелгән һәр пар иң ихлас соклану сүзләренә лаек булды. Аларны Нурлат шәһәре башлыгы урынбасары Николай Липатов котлады, рәхмәт хатлары белән чәчәк бәйләмнәре тапшырды.

Күңелле бәйрәм атмосферасын җирле үзешчән артистларның тәэсирле чыгышлары дәвам итте, алар кунакларга иҗади музыкаль номерлар бүләк иттеләр.