Татарстанлыларның яртысыннан артыгы спорт белән даими шөгыльләнә

Татарстан физик культураны үстерүдә югары планканы саклап калуын дәвам итә. 2025 елның төп нәтиҗәсе – спорт белән системалы рәвештә шөгыльләнүче кешеләр санының артуы. Хәзер бу күрсәткеч 67,2% тәшкил итә. Әлеге нәтиҗә белән республика Идел буе федераль округында икенче урынны били һәм ил буенча иң алдынгы 5 төбәк исемлегенә керә. Бу хакта ТР Спорт министрлыгының йомгаклау коллегиясендә чыгыш ясаган ведомство башлыгы Владимир Леоновның сүзләренә таянып, “Казанские ведомости” яза.
Узган ел Татарстанда 133 яңа спорт объекты файдалануга тапшырылган. Инфраструктурага салынган инвестицияләрнең гомуми күләме 12,5 млрд сумнан артып киткән.

Төзелеш географиясе эре шәһәрләрне дә, авыл җирлекләрен дә үз эченә ала. 2026 елда темплар кимемәячәк: республика районнарында дүрт футбол манежы төзү планлаштырылган. Профессиональ секторга да аерым игътибар бирелә – Казанның “Рубин” командасы өчен заманча Футболны үстерү үзәге төзелеше тәмамланып килә.

2025 елда массакүләм спорт катнашучыларның саны буенча да яңа дәрәҗәгә чыккан. Казан марафоны 35 меңнән артык кешене җыеп, рекорд куйган. Муниципаль стартлар тагын да амбицияле максат куя – ай саен 100 меңгә кадәр кешене даими спортка җәлеп итү. Өлкән буын арасында спорт белән шөгыльләнүчеләрнең өлеше 36,1%ка кадәр арткан.

2025 ел йомгаклары буенча Татарстанның спорт өлкәсенә кертелгән гомуми инвестицияләр 25,7 млрд сумга җиткән. Бу саннар – статистика гына түгел, ә гражданнарның сәламәтлеге һәм спорт культурасын үстерү республиканың дәүләт сәясәтендә төп өстенлек булуының турыдан-туры дәлиле.