“Заречный” балаларны сәламәтләндерү лагеренда Туган тел көне үтте

Шул көннәрдә “Заречный” балаларны сәламәтләндерү лагеренда гадәти шау-шу һәм мәшәкатьләрне үзенчәлекле иҗади һәм танып-белү атмосферасы алыштырды. Биредә балалар өчен туган тел, тарих һәм халык традицияләренә багышланган бәйрәм оештырылды.

Аны шәһәрнең 1нче һәм 2нче мәктәпләренең туган тел һәм әдәбият укытучылары оештырды. Нәкъ менә алар лагерьның гадәти бер көнен туган якның мәдәни мирасы буйлап кызыклы сәяхәткә әйләндерделәр һәм хәтта иң шук, тынычсыз балаларны да кызыксындыра алдылар.

Чараның программасы һәр бала үзен төрле рольләрдә сынап карый алырлык итеп төзелгән иде. Ял итүчеләр өчен өч тематик мәйданчык оештырылды. Берсендә балалар, зур кызыксыну белән, җитезлек һәм тапкырлык күрсәтеп, традицион халык уеннарының нечкәлекләрен үзләштерделәр. Интеллектуаль викторинада үз белемнәрен сынап карадылар, сораулар тарихка, гореф-гадәтләргә һәм туган тел байлыгына кагыла иде. Ә иҗади мастер-классларда тәҗрибәле остазлар җитәкчелегендә балалар үз талантларын ача һәм үз куллары белән төрле кул эшләре ясый алдылар.

Бу көн яшь нурлатлыларга онытылмаслык якты хис-тойгылар һәм күтәренке кәеф кенә түгел, ә кыйммәтле белемнәр дә бүләк итте. Уен формасында балалар төрле милләт халыкларының мәдәнияте белән тирәнрәк таныштылар, туган телнең матурлыгын тойдылар һәм ата-бабаларыбызның гореф-гадәтләре турында күп яңа мәгълүмат белделәр.